அறிவினுள் எல்லாந் தலையென்ப...

 

அறிவினுள் எல்லாந் தலையென்ப உரைத்தாளும்

வருத்தி வருத்தி வாழ்விழக்கச் செய்தப்பின்

ஞானியாய் ஞான உபதேசம் செய்யும்

செறுக்கில்லா முட்டாளாய் இருப்பதில்தான்

சுவாரசியங்கள் மிகுந்திருக்கிறது…

 

பாவங்கள் தூர்வார்க்கப்பட்டு புதிது புதிதாய்

சமரசம் செய்யும் போது

அரிச்சந்திரனாகவும்

புத்தப்பிட்சுவாகவும் யார் யாரோ

வந்து போவர் மனிதம் எனும் முகமூடி அணிந்து

 

வள்ளலாரின் பரம்பரைத் தொடங்கி

மகாத்மா காந்திவரை சத்தியசோதனையாய்

மிக சகஜமாய் நமக்குச் சவக்குழி தோண்டி நிற்பர்

வாய்ப்பிளந்து வார்த்தைகள் தொலைக்கும் அக்கணத்திலேயே

சமாதியாகும் சாத்தியங்களும் உண்டு

 

இலக்கியம் சார்ந்த கற்றலும்

இயற்கை சார்ந்த வாழ்வும்

இடம் பொருள் ஏவலுக்கு எட்டாத தூரத்தில்

 

உலகத்தோடு ஒட்ட ஒழுக அவசியம் எனில்

செறுக்கில்லா முட்டாளாய் இருப்பதில்தான்

சௌகரியங்கள் மிகுந்திருக்கிறது!

 

-சல்மா தினேசுவரி ( Salma Dhineswary)