சொல்லியதும் சொல்லாததும்

எழுத்துகளின் கோர்வையில்
நொடிப்பொழுதில் தூக்குக்கயிராகவும்
அடுத்த கணமே தாலாட்டும் தூளியாகவும்
தயக்கமே இல்லாமல் நடைப்பழகும் வார்த்தைகள் பல...

எய்தவனின் நல்ல வார்த்தைகள்
நம் பேரேட்டில் நிலைப்பதில்லை...
கெட்ட வார்த்தைகளை மட்டுமே
கடிவாளமிட்டுக் கொள்கிறோம்...

மரணிக்க வேண்டிய வார்த்தைகளை
நித்தம் நித்தம் வளர்த்தெடுக்கிறோம்
மரணித்த வார்த்தைகளையும்
சாக்காடு வரை சென்று மீட்டெடுக்கிறோம்...

விடுபட்ட வார்த்தைகளில்
பகைமை வளர்த்து,
விடுபடாத நம் வார்த்தைகளின் மௌனத்தில்
ஒளிந்து கொள்கிறோம்...

உறவு பிடித்து வாழ்வதில்
பழக்கப்பட்டவர்கள் இல்லை நாம்...
வேண்டாத சொற்களைப் பிடித்தே
காலம் தள்ளுகிறோம்.